You are here: Skip Navigation LinksFeMSEDA Web Portal

 

FeMSEDA Web Portal
 






ሰሞናዊ ዜና ጥር 7 /2006 ዓ.ም



የ2006 ዓ.ም የአንደኛ ዙር ሀገራቀፍ የሞዴል የጥቃቅንና አነስተኛ ኢንተርፕራይዞች ኤግዚቢሽንና ባዛር ተከፈተ፡፡


► በኤግዚቢሽኑ በዋናነት ለማኑፋክቸሪንግ ዘርፍ ልዩ ትኩረት ተሰጥቶበታል፡፡
► 168 ኢንተርፕራይዞች፣ 12 የፈጠራ ባለሙያዎችና ዲዛይነሮች፣ የነጋዴ ሴቶች ማህበራት፣ የብድርና የፋይናንስ ተቋማት፣ የቴክኒክና ሙያ ተቋማት ና የብረታ ብረትና ኢንጅነሪንግ ኮርፖሬሽን ተሳታፊ ሆነውበታል፡፡
► ከጥር 7 – 12/2006 ድረስ ይቆያል፡፡

በፌዴራል የጥቃቅንና አነስተኛ ኢንተርፕራይዞች ልማት ኤጀንሲ አዘጋጅነት በዘርፉ የሚሳተፉ ኢንተርፕራይዞችን የገበያ ችግር ለመቅረፍና የልምድና የክህሎት ልውውጥ እንዲያገኙ ለማድረግ በየ ስድስት ወሩ የሚዘጋጀው ሀገር አቀፍ ኤግዚቢሽንና ባዛር ጥር 7/2006 በደማቅ ሁኔታ ተከፈተ፡፡

 

ኤግዚቢሽኑን መርቀው የከፈቱት የከተማ ልማት፣ ቤቶችና ኮንስትራክሽን ሚኒስቴር ሚኒስትር ዴኤታ ክቡር አቶ ደሳለኝ አምባው እንደገለፁት የጥቃቅንና አነስተኛ ኢንተርፕራይዞች ልማት ዘርፍ በውስን ካፒታል በርካታ ሰው ሃይል የሚሰማራባቸውና የቴክኖሎጂና የፈጠራ ማዕከላት በመሆን ኢኮኖሚያችንን ከግብርና መር ወደ ኢንዱስትሪ ለማሸጋገር በሚደረገው ጥረት ውስጥ ሚናቸው የጎላ ነው፡፡ በመሆኑም የዘርፉ ዋነኛ ግብ ለዜጎች የስራ እድል ከመፍጠር ባለፈ በቀጣይ በሃገራችን ለሚገነባው ኢንዱስትሪ መር ኢኮኖሚ መሰረት የሚሆኑ ኢንተርፕራይዞችን ማፍራት በመሆኑ በዘርፉ የምናከናውናቸው ስራዎችም ይህንን በተገቢው መንገድ የሚደግፉና ለቀጣይ ስራችን መሰረት የሚጥሉ መሆን ይኖርባቸዋል፤ ብለዋል፡፡

 


ሚኒስትር ዴኤታው አያይዘው እንደገለፁት ይህን ኤግዚቢሽንና ባዛርም ኢንተርፕራይዞቹ የገበያ ትስስር በመፍጠር ልምድና ተሞክሯቸውን ለመለዋወጥ በአግባቡ እንዲጠቀሙበት አሳስበዋል፡፡ የኤጀንሲው የፋሲሊቴሽን ዘርፍ ምክትል ዋና ዳይሬክተር አቶ በቀለ መንግስቱ በበኩላቸው የጥቃቅንና አነስተኛው ዘርፍ ባለፉት ሶስት አመታት ብቻ ከ3.9 ሚሊየን በላይ ለሆኑ ዜጎች የስራ እድል መፍጠር መቻሉን ጠቅሰው በዚህም ሃገሪቱ እያደረገች ላለችው የኢኮኖሚ ሽግግር ጉዞ ወሳኝ ሚና ሊጫወቱ የሚችሉ ሞዴል የጥቃቅንና አነስተኛ ኢንተርፕራይዞችን መፍጠር እንደተቻለ ገልጸዋል፡፡ ይህ ውጤትም በዘርፉ የተሰማሩ አስፈፃሚ አካላት ባደረጉት ያላሰለሰ ጥረትና ርብርብ ከመሆኑም ባሻገር የዘርፉ ስትራቴጂም የዜጎቻችንን ህይወት በመለወጥ ረገድ ውጤታማ መሆኑንና እንደሃገርም በትክክለኛው የእድገት ጎዳና ላይ መጓዛችንን የሚያመላክት ነው ብለዋል፡፡

 


አቶ በቀለ አያይዘውም በአሁኑ ጊዜ ኤጀንሲው በተለይ በማኑፋክቸሪንግ ዘርፍ ለተሰማሩ ኢንተርፕራይዞች ተፈላጊውን የቴክኖሎጂና የክህሎት ደረጃ ይዘው ምርታማነታቸው እንዲጨምርና በገበያ ተወዳዳሪ የሚያደርጋቸው ጥራት ያለው ምርት እንዲያመርቱ ማስቻል ላይ ትኩረት ተሰጥቶ እንደሚሰራ ገልፀዋው ይህ ኤግዚቢሽናና ባዛርም ምርቶቻቸውን ለገበያ በማቅረብና ለመሸጥ እንዲሁም ከደንበኞቻቸው ጋር በቅርበት ለመመካከርና እርስ በርሳቸውም ልምዶችን ለመለዋወጥ የሚያስችላቸውን አጋጣሚ እንደሚፈጥርላቸው ገልጸዋል፡፡ በኤጀንሲው የገበያ ልማትና ግብይት ዳይሬክቶሬት ዳይሬክተር የሆኑት አቶ ዘሪሁን አለማየሁ የኤግዚቢሽኑን ዝግጅት አስመልክተው አጭር ሪፖርት ያቀረቡ ሲሆን ኤግዚቢሽኑን ከ30000 በላይ ሰዎች ይጎበኙታል ተብሎ እንደሚጠበቅና የ6 ሚሊየን ብር የገበያ ትስስር ለማፍጠር መታቀዱን አብራርተዋል፡፡

 



 



 



 



 


<----------------------------------------------------------------------------------->


በኢንተርፕርነርሽፕ፣ በዘርፉ ስትራቴጂና በቢዝነስ ፕላን ዝግጅት ዙርያ ለ7 ቀናት በአዳማ ከተማ ሲሰጥ የቆየው ስልጠና ተጠናቀቀ፡፡

የዘርፉ አስፈጻሚ አካላትን የማስፈጻም አቅም ማጎልበትን መሰረት በማድረግ ከደቡብና ከኦሮሚያ ክልሎች ለተውጣጡ 165 የዘርፉ አመራሮችና የአንድ ማእከል ባለሙያዎች ለአንድ ሳምንት በአዳማ ከተማ አስተዳደር ሲሰጥ የነበረው ስልጠና ተጠናቀቀ፡፡

 

ከታህሳስ 7 እስከ 11 ቀን 2006 የተሰጠው ስልጠና ማጠቃለያ ላይ የፌዴራል የጥቃቅንና አነስተኛ ኢንተርፕራይዞች ልማት ኤጀንሲ ዋና ዳይሬክተር አቶ ገ/መስቀል ጫላ እንደገለጹት፣ ስልጠናው የዘርፉን አቅም ለመገንባት ከሚሰጡ ድጋፎች አንፃር ወሳኝ እንደሆነ ጠቅሰው ሰልጣኞች ከስልጠናው ያገኙትን መሰረት በማድረግና በማዳበር ለዘርፉ ሥራዎች ውጤታማነት ጥረት ማድረግ እንደሚገባቸው ጠቅሰዋል፡፡

 


ዋና ዳይሬክተሩ አያይዘውም ከሰልጣኞቹ በዋናነት ሶስት መሰረታዊ ጉዳዮች እንደሚጠበቁ ጠቅሰው አንደኛው ሰልጥነው ወደመጡበት ወረዳና ዞን ሲመለሱ ለሌሎች የአንድ ማእከል አገልግሎት ባለሙያዎች ያገኙት ዕውቀት በማካፈል የእውቀትና የክህሎት ሽግግር ማድረግና የተቀላጠፈ የአሰራር ስርአት መዘርጋት ሲሆን ሌላኛው ሃገሪቱን ከግብርና መር ኢኮኖሚ ወደ ኢንዱስትሪ መር ኢኮኖሚ ለማሸጋገር ትልቁን ድርሻ የሚይዘውን የማኑፋክቸሪንግ ዘርፍ ለማሳደግ ትኩረት ሰጥተው መንቀሳቀስ እንደሚገባቸው ገልጸዋል፡፡ በዘርፉ የትኩረት አቅጣጫ ከሆኑት አንዱ የመረጃ አያያዝ ስርዓታችንን ማሳደግ መሆኑን የጠቀሱት ዋና ዳይሬክተሩ ስራዎች ምንም ያህል ቢሰሩ በመረጃ ካልተደገፉ ዋጋ እንደሌላቸውና በዘርፉ የሚከናወን እያንዳንዱን ተግባር በመመዝገብ የተቀላጠፈ የመረጃ አያያዝ ሊኖር እንደሚገባ አሳስበዋል፡፡ ስልጠናውን ከደቡብ 52 ከአዳማ ከተማ 52 እንዲሁም ከኦሮሚያ ልዩ ልዩ ዞኖች 61 ሰልጣኞች የተከታተሉት ሲሆን ያነጋገርናቸው የስልጠናው ተሳታፊዎች እንደገለፁት ስልጠናው የነበረባቸውን የክህሎት ክፍተት ከመሙላት አንፃር በጣም ትልቅ ዋጋ እንዳለው ጠቅሰው በተለይም የስልጠናው አሰጣጥ አሳታፊ መሆኑ አዳዲስ ስራ ፈላጊዎችንና በስራ ላይ ያሉ አንቀሳቃሾችን ከማበረታታትና ከመደገፍ አንፃር ትልቅ ዕውቀት እንዳገኙበት ገልጸዋል፡፡

 


በስልጠናው ማጠቃለያ ላይ የአዳማ ከተማ ምክትል ከንቲባና የአዳማ ከተማ የጥቃቅንና አነስተኛ ኢንተርፕራይዞች ልማት ፅ/ቤት ሃላፊ አቶ አህመድ የሱፍ፣ እንዲሁም የአዳማ ከተማ የቴክኒክና ሙያ ስልጠና ፅ/ቤት ሃላፊ አቶ አህመድ በከሊ ተገኝተው ከፌዴራል ኤጀንሲው ዋና ዳይሬክተር ጋር በመሆን ለሰልጣኞቹ የምስክር ወረቀት ሰጥተዋል፡፡ የስልጠናው አስተባባሪና የኤጀንሲው የአቅም ግንባታ ዳይሬክቶሬት ዳይሬክተር አቶ ሲራክ ማሞ ስልጠናው በዚህ ክልል ብቻ እንደማያበቃና በሌሎችም ክልሎች የሚገኙ የዘርፉ አስፈጻሚ አካላትን አቅም ለመገንባት በሚያስችል መልኩ እንደሚቀጥል ጠቅሰዋል፡፡
-----------------------------//--------------------------------------------
ለታላቁ የኢትዮጵያ ህዳሴ ግድብ እውን መሆን ሁለገብ ድጋፋቸውን አጠናክረው እንደሚቀጥሉ የፌዴራል የጥቃቅንና አነስተኛ ኢንተርፕራይዞች ልማት ኤጀንሲ ሰራተኞችና ታዳጊ መካከለኛ ኢንተርፕራይዞች ገለጹ፡፡

የኤጀንሲው ሰራተኞችና ወደ ታዳጊ መካከለኛ የተሸጋገሩ ኢንተርፕራይዞች ህዳር 29 ቀን 2006 ዓ.ም ታላቁን የኢትዮጵያ ህዳሴ ግድብ ፕሮጀክት የጎበኙ ሲሆን በጉብኝቱም ለግድቡ ግንባታ ከ160 ሺህ ብር በላይ የቦንድ ግዢ ቃል ተገብቷል፡፡ የፌዴራል የጥቃቅንና አነስተኛ ኢንተርፕራይዞች ልማት ኤጀንሲ የእቅድና ፕሮጀክት ዝግጅትና ክትትል ዳይሬክቶሬት ዳይሬክተር አቶ ጌታቸው ታደሰ በወቅቱ እንደገለጹት ፕሮጀክቱ ሀገራችን ወደ ኢንዱስትሪ መር ኢኮኖሚ ለምታደርገው ሽግግር የጀርባ አጥንት በመሆን ወሳኝ ሚና ያለው ሲሆን በጥቃቅንና አነስተኛው ዘርፍ ለተሰማሩ ኢንተርፕራይዞችም የኃይል አቅርቦት ፍላጎታቸውን በማሟላት ውጤታማነታቸውን እንደሚያሳድግ ገልጸዋል፡፡

 

የጉብኝቱን ዓላማ አስመልክቶ አቶ ጌታቸው አያይዘው እንደገለጹት የኤጀንሲው ሰራተኞችና አንቀሳቃሾቹ ለዚህ ታላቅ ፕሮጀክት ዳር መድረስ ከግድብ ግንባታ ጅማሬው አንስቶ ሲያደርጉት የነበረውን ድጋፍ አጠናክረው በመቀጠል ለቀጣዩ ትውልድ የበለጸገች ሀገር ለማስረከብ ያላቸውን ቁርጠኝነት ለመግለጽ መሆኑን ገልፀዋል፡፡ በጉብኝቱ ወቅት የፕሮጀክቱ ስራ አሥኪያጅ ኢንጅነር ስመኘው በቀለ እንደገለፁት በአሁኑ ወቅት በታላቁ የኢትዮጵያ ህዳሴ ግድብ ግንባታ ከ6500 በላይ ሰራተኞች በስራ ላይ እንደሚገኙ ጠቁመው በጥቃቅንና አነስተኛ ዘርፍ የተደራጁ ኢንተርፕራይዞች አስተዋጽኦም እጅግ ከፍተኛ መሆኑን ገልጸዋል::

 


ዘጠና አራት የሚሆኑ ከኦሮሚያ ክልልና ከአዲስ አበባ ከተማ አስተዳደር የተውጣጡ ኢንተርፕራይዞችና የኤጀንሲው ሰራተኞች በተካፈሉበት በዚሁ ጉብኝት ከኦሮሚያ ክልል የመጡት አንቀሳቃሾች የ160 ሺህ ብር ቦንድ ለመግዛት ቃል የገቡ ሲሆን ሌሎች የጉብኝቱ ተሳታፊዎችም ለግድብ ግንባታው ስኬታማነት የጀመሩትን ድጋፍ አጠናክረው እንደሚቀጥሉ ገልጸዋል፡፡
------------------------------------------//---------------------------------------------
በዘርፉ የተጀመረውን በጋራ የማቀድ፣ የመተግበርና የመከታተል ስራ አጠናክሮ በመቀጠል የኢንዱስትሪ ሽግግሩን ማፋጠን እንደሚገባ ተገለጸ ፡፡

በጥቃቅንና አነስተኛ ኢንተርፕራይዞች ልማት ዘርፍ የተገኘውን ውጤት አጠናክሮ በማስቀጠል በያዝነው በጀት ዓመት በሥራ እድል ፈጠራ ተደራቢ ድል ለማስመዝገብ ርብርብ እንደሚደረግ የከተማ ልማት ቤቶችና ኮንስትራክሽን ሚኒስትሩ ክቡር አቶ መኩሪያ ኃይሌ ገለጹ፡፡

 

በባህርዳር ከተማ ለአንድ ሳምንት ሲካሄድ የቆየው የኢትዮጵያ ከተሞች ሳምንት ዝግጅት መዝጊያ ስነስርዓት ላይ ክቡር ሚኒስትሩ እንደገለጹት በበጀት ዓመቱ በዋነኝነት ለማኑፋክቸሪንግ ኢንዱስትሪ ዘርፍ ልዩ ድጋፍ በማድረግ ለሀገራችን ኢኮኖሚ መዋቅር ሽግግር መሰረት መጣል ይጠበቅብናል ብለዋል፡፡ በሥነ ሥርዓቱ ላይ ቁጥራቸው 659 የሚደርሱ ከጥቃቅንና አነስተኛ ወደ ታዳጊ መካከለኛ የተሸጋገሩ ኢንተርፕራይዞች የሜዳሊያና ምስክር ወረቀት የተሰጣቸው ሲሆን ሞዴል ሆነው የተመረጡ ጥቃቅንና አነስተኛ ኢንተርፕራይዞች እና ምርጥ ኢንተርፕርነሮችም ሽልማት ተበርክቶላቸዋል፡፡ በዝግጅቱ ላይ በክብር እንግድነት በመገኘት ለተሸላሚ ኢንተርፕራይዞቹ የሜዳሊያና የዋንጫ ሽልማት ያበረከቱት የሕዝብ ተወካዮች ምክር ቤት አፈ-ጉባኤ ክቡር አቶ አባዱላ ገመዳ እንደገለጹት የከተሞች እድገት በዋነኛነት የሚለካው ታታሪና ስራ ፈጣሪ በሆኑ ነዋሪዎቻቸው መሆኑን ጠቅሰው ከተሞቻችን ለጥቃቅንና አነስተኛ ኢንተርፕራይዞች ልማትና ለሥራ ፈጠራው ትኩረት ሰጥተው ሊንቀሳቀሱ እንደሚገባ ገልጸዋል፡፡

 



ከህዳር 11 እስከ 17 ቀን ድረስ ሲካሄድ የቆየው አምስተኛው የኢትዮጵያ ከተሞች ሳምንት “ከተሞቻችን የኢንተርፕራይዞቻችን ልማት ማዕከላት በመሆን የመለስን ሌጋሲ ያስቀጥላሉ” በሚል መሪ ቃል የተከበረ ሲሆን ከ” 97 በላይ የሆኑ ከተሞች የተሳተፉበትና በርካታ የጥቃቅንና አነስተኛ ኢንተርፕራይዞች የፈጠራ ስራዎቻቸውን ያቀረቡበትና ተሞክሮአቸውን የተለዋወጡበት ደማቅ መድረክ በመሆን ተጠናቋል፡፡

 


<----------------------------------//----------------------------------->

በ3ቱ ቀን የውይይት መድረክ የአንድ ማዕከል መሪ ዕቅድ፣ የፋይናንስ፣ የመስሪያና የመሸጫ ቦታ እንዲሁም የብድር ዋስትና ፈንድ ድጋፍ በዕድገት ደረጃ፣ በንግድ ፈቃድ አሰጣጥ፣ በንግድ አድራሻ፣ በንግድ ስያሜ፣ የግብር ከፋይነት መለያ ቁጥር አሰጣጥ፣ የገበያ ድጋፍ በዕድገት ደረጃ፣ የዘርፉ የውጭ ሀገር ገበያ መሪ ዕቅድ፣ የማኑፋክቸሪንግ ዘርፍ መሪ ዕቅድና 2006 በጀት ዓመት የመጀመርያው ሩብ ዓመት ዕቅድ አፈጻጸም ቀርቦ ሰፊ ውይይት ተካሂዶበታል፡፡

 


በውይይት መድረኩ የዘርፉ ባለድርሻ አካላት ከሆኑት ከንግድ ሚኒስቴርና ከገቢዎችና ጉምሩክ ባለስልጣን የተወከሉ አካላት መ/ቤቶቻቸው ለጥቃቅንና አነስተኛ ኢንዱስትሪው ዘርፍ በሚሰጣቸው አገልግሎቶች ዙርያ ገለጻ ያቀረቡ ሲሆን ለተነሱ ጥያቄዎችም ማብራሪያ ሰጥተዋል፡፡

 


በውይይቱ ማጠቃለያ ላይ የኤጀንሲው ዋና ዳይሬክተር አቶ ገ/መስቀል ጫላ እንደተናገሩት ባለፉት 3 ዓመታት ዘርፉ በስራ ዕድል ፈጠራ ረገድ ውጤታማ ስራ ማከናወኑን አስታውሰው ነገር ግን መንግስት ለዘርፉ ከሰጠው ትኩረትና ከሚጠበቅበት ከፍተኛ ኃላፊነት አንጻር በየደረጃው ያለ የዘርፉ አመራር ባለሙያውንና ባለድርሻ አካላትን በማካተት በልማት ሰራዊት አግባብ የሚጠበቅበትን ከመወጣት አንጻር ብዙ እንደሚቀር ተናግረዋል፡፡ አቶ ገ/መስቀል አያይዘውም በዘርፉ ውጤታማ ስራ ለመስራት ዕውቀትና ልምድ የሚስፈልግ ቢሆንም ቁርጠኝነት ግን ከምንም በላይ መሆኑ ታውቆ የዘርፉ አመራር፣ ባለሙያና ባለድርሻ አካላት ሀገሪቱ ልታደርግ ያሰበችውን የኢኮኖሚ ሽግግር በከፍተኛ ደረጃ አሳካዋለሁ በሚል አቋምና በጊዜ የለኝም መንፈስ ዘርፉን ውጤታማ ማድረግ ይጠበቅበታል ብለዋል ፡፡

<----------------------------------//----------------------------------->
ጥቃቅንና አነስተኛ ኢንተርፕራይዞችን ከመካከለኛና ከፍተኛ ኢንዱስትሪዎች ጋር ለማስተሳሰር የሚደረገው ጥረት የሁለቱንም ወገን ጥቅም ባረጋገጠ መልኩ እንዲሆን ተጠየቀ፡፡

በየፌዴራል ጥቃቅንና አነስተኛ ኢነትፕራይዞች ልማት ኤጀንሲ የጥቃቅንና አነስተኛ ኢንተርፕራይዞችን ከመካከለኛና ከፍተኛ ኢንዱስትሪዎች ጋር ለማስተሳሰር በተዘጋጀው ማስፈጸሚያ ዕቅድ ላይ ውይይት ተደረገ ፡፡

 


ጥቅምት 27/2006 ዓ.ም በኤጀንሲው የመሰብሰቢያ አዳራሽ የተካሄደውን ውይይት በንግግር የከፈቱት ኤጀንሲው የፋስሊቴሽን ዘርፍ ም/ዋና ዳይሬክተር አቶ በቀለ መንግስቱ እንደተናገሩት በማኑፋክቸሪንግ ዘርፍ የተሰማሩና የሚሰማሩ የጥቃቅንና አነስተኛ አንቀሳቃሾች ከመካከለኛና ከፍተኛ ኢንዱስትሪዎች ጋር በመተሳሰር የቴክኖሎጂ፣የገበያና የክህሎት ሽግግር እንዲኖርና ኢንዱስትሪውም ውጤታማ እንዲሆን በማረድግ የጋራ ተጠቃሚነትን ማረጋገጥ የዘርፉ አስፈጻሚ አካላት የትኩረት አቅጣጫ መሆን ይገባዋል ፡፡ አቶ በቀለ አያይዘውም በምክክር መድረኩ ተሳታፊ የሆኑት የዘርፉ አስፈጻሚ አካላት በተጨባጭ መሬት ላይ እየተከናወነ ያለውን የኢንተርፕራይዞችንና ኢንዱስትሪዎችን ሁለንተናዊ ትስስር በአግባቡ ተገንዝበው በጋራ እንዲሰሩና ለዘርፉ ልማት ስኬት የበኩላቸውን አስተዋጽኦ እንዲያበረክቱ ለማስቻል የተዘጋጀ መድረክ መሆኑን ተናግረዋል፡፡ ለአንድ ቀን በተካሄደው በዚሁ የምክክር መድረክ በኤጀንሲው የጨርቃ ጨርቅና ቆዳ ውጤቶች ዳይሬክቶሬት ዳይሬክተር አቶ ምንተስኖት አስፋው በተመረጡ የኦሮምያ ከተሞች እና የአዲስ አበባ ክፍለ ከተሞች በፓይለት ደረጃ በማኑፋክቸሪንግ ዘርፍ ላይ የተሰማሩ የጥ/አ/ኢንተርፕራይዞችን ከመካለኛና ከፍተኛ ኢንዱስትሪዎች ጋር ለማስተሳሰር የተዘጋጀውን ዕቅድ ሲያቀርቡ፣ የኮንስትራክሽን ዘርፍ ዳይሬክቶሬት ዳይሬክተር የሆኑት አቶ ሰለሞን አሰፋ በበኩላቸው የዕሴት ሰንሰለት ጥናትን በተመረጡ ከተሞች በናሙና መልክ በመተግበር ለማስፋት የሚሰ’ሩ የቅድመ ዝግጅት ስራዎችን አቅርበው ሰፊ ውይይት ተደርጎበታል፡፡ በውይይት መድረኩ ከፌዴራል የዘርፉ አስፈጻሚ አካላት አንዱ የሆነው ቆዳና የቆዳ ውጤቶች ኢንስቲትዩት፣ከኦሮምያ ና ከአዲስ አበባ ከተማ አስተዳደር መካከለኛና ከፍተኛ ኢንዱስትሪ ከሚበዙባቸው ከተሞችና ከፍለ ከተሞች የተውጣጡ 35 አመራሮችና ባለሙዎች ተሳታፊ ሁነዋል፡፡

<----------------------------------//----------------------------------->
በዘርፉ ለተያዙ የልማት ግቦች ስኬታማነት ከህዝብ ክንፉ አደረጃጀቶች ጋር በጋራ የመስራቱ ሁኔታ ተጠናክሮ ሊቀጥል እንደሚገባ ተገለጸ፡፡

የፌዴራል ጥቃቅንና አነስተኛ ኢነትፕራይዞች ልማት ኤጀንሲ ከዘርፉ የህዝብ ክንፍ አደረጃጀቶች ጋር ጥቅምት 16/2006 ዓ.ም የምክክር መድረክ አዘጋጅቶ በፌዴራል ደረጃ ከሚገኙ የሴቶችና የወጣት ማህበራት፣ ሊጎችና ፌዴሬሽኖች ተወካዮች ጋር ውይይት አካሒዷል፡፡

 

 


በዋቤ ሸበሌ ሆቴል የተካሄደውን ወርክሾፕ በንግግር የከፈቱት የኤጀንሲው የፋስሊቴሽን ዘርፍ ም/ዋና ዳይሬክተር አቶ በቀለ መንግስቱ እንደተናገሩት ሀገራችን ከግብርና መር ክፍለ ኢኮኖሚ ወደ ኢንዱስትሪ መር ክፍለ ኢኮኖሚ ለመሸጋገር እያደረገች ያለውን ጥረት በከፍተኛ ደረጃ እያገዘ የሚገኘውን የጥቃቅንና አነስተኛ ኢንተርፕራይዞች ልማት ዘርፍ በተደራጀ የልማት ሰራዊት ለመፈጸም እንዲቻል መድረኩ መዘጋጀቱን ተናግረዋል፡፡ አቶ በቀለ አያይዘውም በምክክር መድረኩ ተሳታፊ የሆኑት አካላት በተጨባጭ መሬት ላይ እየተከናወነ ያለውን እንቅስቃሴ ተገንዝበው በጋራ እንዲሰሩና ለዘርፉ ልማት ስኬት የበኩላቸውን አስተዋጽኦ እንዲያበረክቱ ለማስቻል መድረኩ የተዘጋጀ መሆኑንም ጭምር ገልጸዋል፡፡ ለአንድ ቀን በተካሄደው በዚሁ የምክክር መድረክ ተሳታፊዎች በዘርፉ ልማት ስትራቴጂ፣በ2005 ዕቅድ አፈጻጸም እና በአፈጻጸሙ ላይ የታየ የህዝብ ክንፍ ተሳትፎ ፣የ2006 በጀት ዓመት ዕቅድ እና የህዝብ ክንፉ ኃላፊነትና ሚና በሚሉ ርዕሶች ላይ ሰፊ ገለጻና ውይይት ተደርጓል፡፡

 


የወርክሾፑ ተሳታፊ ከሆኑት መካከል የኢትዮጵያ ከፍተኛ ትምህርት የተማሪዎች ህብረት ተወካይ የሆነው መሃሪ ዳኘውና የኢትዮጵያ ራስ ገዝ ማህበር ተወካይ የሆኑት ወ/ሮ ንግስት ዘለቀ እንደገለጹት መድረኩ በእጀጉ ጠቀሚ መሆኑን ጠቁመው በየደረጃው ካለው የጥቃቅንና አነስተኛ ኢንተርፕራይዞች ልማት ኤጀንሲ ጋር ጥብቅ የሆነ የስራ ትስስር በመፍጠር ሀገሪቱ የተያያዘቸውን የኢንዱስትሪ ሽግግር እንደሚግዙ አረጋግጠዋል፡፡ በምክክር ወርክሾፑ ቁጥራቸው ከ80 የሚበልጡ የወጣቶች ሊግ፣ የሴቶች ሊግ፣የወጣቶች ፌዴሬሽን፣የሴቶች ፌዴሬሽን፣የመንግስት ዩኒቨርስቲ ተወካዮች፣የኢትዮጵያ ዘርፍ ማህበራት ፣ራስ አገዝ ሴቶችና የኢትዮጵያ ሴቶች ሚዲያ ማህበራት ተውካዮች ተሳታፊ ሁነዋል፡፡
<----------------------------------//----------------------------------->
የፌደራል ጥቃቅንና አነስተኛ ኢንተርፕራይዞች ልማት ኤጀንሲ የካይዘን ቴክኒክ የአሰልጠኞች ስልጠና ሰጠ::

የፌደራል ጥቃቅንና አነስተኛ ኢንተርፕራይዞች ልማት ኤጀንሲ ከሁሉም ክልሎችና ከ2ቱ የከተማ አስተዳሮች ለተውጣጡ የዘርፉ አመራሮችና የጥቃቅንና አነስተኛ የአንድ ማዕከል ባለሙያዎች በካይዘን አተገባበር ዙርያ ከመስከረም 7/2006 ዓ.ም እስከ መስከረም 13/2006 ዓም የአሰልጠኞች ስልጠና ሰጠ፡፡ በአዳማ ከተማ በተሰጠው ስልጠና የፌደራል ጥቃቅንና አነስተኛ ኢንተርፕራይዞች ልማት ኤጀንሲ የካይዘን ክትትል ዳይሬክቶሬት ዳይሬክተር አቶ አስፋው አበበ እንደተናገሩት የስልጠናው ዓላማ የቴክኒክና ሙያ ትምህርት ተቋማት ካይዘንን በሚተገብሩበት ወቅት የጥቃቅንና አነስተኛ ኢንተርፕራይዞች መዋቅር በዕውቀት ላይ የተመሰረተ ክተትል በማድረግ ኢንተርፕራይዞች ካይዘንን መተግበር ከጀመሩ በኋላ ወደ ኋላ እንዳይመለስ በማድረግ ቀጣይነት ያለውን ለውጥ እንዲያረጋጡ፣ውጤታማ፣መሰረታዊ መሻሻልና እድገትን እንዲያረጋጡ ለማድረግ ነው ብለዋል፡፡

 

 


አቶ አስፋው አያይዘውም የአሰልጣኞች ስልጠና ተሳታፊዎች በመዋቅሩ ውስጥ ያሉ ያልሰለጠኑ ሌሎች ባለሙያዎችን ከማሰልጠን ባሻገር ኢንተርፕራይዞች ካይዘንን እንደ ለውጥ መሳርያ በመጠቀም ጥራትን በማሳደግ፣ ወጭን በመቀነስና ምርታቸውን እንዲያሳድጉ ክትትል የማድረግ ሃላፊነት አለባቸው ብለዋል፡፡ ዳይሬክተሩ አክለውም ከስልጠናው በኋላ የስልጠናው ተሳታፊዎች አገልግሎት ፈልገው ለሚመጡ ደምበኞችና ሰራተኞች የአግለግሎት አሰጣጥ እርካታን በማሻሻል ረገድም ሚናቸው የጎላ ይሆናል ብለዋል፡፡

 


ከትግራይ ክልል የመጡት ወ/ሮ አበባ ካሳና ከኦሮምያ ክልል የመጡት አቶ ተዋበ ሁሴን እንደተናገሩት የካይዘን የአስልጣኝነት ስልጠና ተሳታፊ በመሆናቸው ጠቃሚ ዕውቀትን እንዳገኙ ገልጸው ወደ የክልሎቻቸው ሲመለሱ በስልጠናው ወቅት ያገኙትን ዕውቀት ለሌሎች የስራ ባልደረቦቻው እንደሚያካፍሉ በመግለጽ የተሰጣቸውን ስልጠና በሚሰሩበት ቦታ ብቻ ሳይሆን በግል ህይወታቸው ላይም ሙሉ በሙሉ ለመተግበርም እንደተዘጋጁ አረጋግጠዋል፡፡ በዚህ የአሰልጣኞች ስልጠና ይሳተፋሉ ተብለው ከታሳቡት 230 ሰልጣኞች መካከል 224 ያህሉ ስልጠናውን የተካፈሉ ሲሆን 29 ያህሉም ሴቶች ናቸው፡፡
<----------------------------------//----------------------------------->

የፌደራል ጥቃቅንና አነስተኛ ኢንተርፕራይዞች ልማት ኤጀንሲ አመራርና ሰራተኞች የኢትዮጵያ ሰንደቅ ዓላማ ቀንን በድምቀት አከበሩ፡፡

የፌደራል የጥቃቅንና አነስተኛ ኢንተርፕራይዞች ልማት ኤጀንሲ አመራርና ሰራተኞች በሀገራችን ለ 6ኛ ግዜ ‹‹ሰንደቅዓላማችን የብዙህነታችን፣የአንድነታንና የህዳሴያችን መገለጫ ነው›› በሚል መሪ ቃል የተከበረውን የሰንደቅዓላማ ቀን በተለያዩ ዝግጅቶች አከበሩ፡፡ በዕለቱ በተዘጋጀው የፓናል ውይይት ላይ ጽሁፍ ያቀረቡት የፌ/ጥ/አ/ኢ/ል/ኤ የልማት ዘርፍ ም/ዋና ዳይሬክተር አቶ አስፋው አበበ እንደተናገሩት ሰንደቅዓላማ የእያንዳንዱን ዜጋ ህይወት እንደሚነካ ተናግረው እንደ ኢትዮጵያውያን ተጨባጭ ሁኔታ ሰንደቅዓላማችን ሰላማችንን፣ልማታችንን፣ዲሞክራሲያዊ አንድነታችንና የወደፊት ብሩህ ተስፋችንን ይወክላል ብለዋል፡፡

 


 


አቶ አስፋው አያይዘውም ኢትዮጵያውያን ሰንደቅዓላማችንን የማፍቀርና ተቻችሎ የመኖር መልካም እሴቶች አሉን፤ ካሉ በኋላ እነዚህን እሴቶች ያዳበርናቸው ተቻችሎ ለመኖርና ሰንደቅዓላማችንን ለማፍቀርና ለማክበር የሚያስችሉን ፖለቲካዊና ኢኮኖሚያዊ መሰረት ባልነበረበት የጨለማ ዘመን ጭምር ነው፤ ነገር ግን ካለፉት 22 ዓመትታ በፊት የነበረው ታሪካችን መቀየሩን ፣ልዩነቶችና ግጭቶችን ፍጹም ሰላማዊ፣ህጋዊ ና ዲሞክራሲያዊ በሆነ መንገድ ብቻ በመፍታት ነባሩን የመቻቻል ባህላችንን በአስተማማኝ መሰረት ላይ እንድናቆመው ያስቻለን ዘመናዊና ዲሞክራሲያዊ ህገ መንግስት ባለቤቶች ነን፤ብለዋል፡፡

 


 


በመጨረሻም ም/ዋና ዳይሬክተሩ በአስተላለፉት መልዕክት በአሁኑ ግዜ ከድህነት በላይ የሀገራችንን ሰንደቅዓላማ ክብር ዝቅ የሚደያርግ ጉዳይ ባለመኖሩ የታላቁ መሪያችንን ውርስ በመጠበቅና በማስቀጠል በድህነት ላይ በሚደረገው ዘመቻ ግንባር ቀደም ሚና በመጫወት ታሪካዊ አደራችንን እንወጣ ሲሉ ጥሪ አስተላልፈዋል፡፡ በዕለቱ የኤጀንሲው ሰረታኞች የሀገራችንን የህዳሴ ጉዞ ለማስቀጠል የድርሻቸውን ለመወጣት ቃለ ማህላ የፈጸሙ ሲሆን የኢትዮጵያን ህዝብ ብሄራዊ መዝሙር ባጋራ በመዘመርና ሰነድቅ ዓላማ በመስቀል ስነስርዓቱ ተጠናቋል፡፡

 

Important Links:

History:

Etege Menen

Empress Menen Asfaw wife and consort of Emperor Haile Selassie I of Ethiopia wearing Ethiopian handmade cloths.

Advertisement

advertisement .